Sæðisvinnsla

Sama dag og eggheimta er gerð þarf að skila sæðissýni. Við bjóðum upp á herraherbergi fyrir þá sem vilja framleiða sitt sýni á staðnum.  Ekki er æskilegt að sýnið sé eldra en klukkustundar gamalt. Starfsmaður á rannsóknastofu tekur á móti sýninu, metur magn þess og skoðar undir smásjá með tilliti til fjölda sáðfrumna og hreyfanleika.

Mikilvægt er að ná bestu sáðfrumunum úr sæðissýninu fyrir frjóvgunarmeðferð. Til þess er notuð skilvinduaðferð þar sem sýnið er sett á lagskiptan vökva og skilið niður í skilvindu. Á þann hátt eru góðar sáðfrumur aðskildar frá þeim sem eru lélegar eða hreyfingalausar. Að því loknu er hreyfanleiki og fjöldi sáðfrumna metinn aftur og frá þeirri niðurstöðu er skorið úr um hvort hefðbundna glasafrjóvgun (IVF) eða smásjárfrjóvgun (ICSI) sé líklegri til að skila árangri. 

Sæðisfrumurnar eru settar í sérstaka ræktunarskál með ræktunarvökva sem inniheldur næringarefni fyrir egg og sæði. Skálin er sett í hitaskáp þar sem sæðisfrumurnar jafna sig þar til að eggjunum er blandað við.

Frysting sæðissýna

Stundum er ástæða til þess að frysta sæðissýni fyrir IVF/ICSI meðferð. Einnig er hægt að frysta sýni sem tekin eru með ástungu á eistu.